عن بثينة كامل: قليل من التدوين، كثير من الرئاسة

يوم السبت الماضي كان فيه حفل إطلاق كتاب دليل التدوين في ساقية الصاوي تحت رعاية فريدريش ناومان، أنا مليش في هذا النوع من الكتب لإن خبراتي السابقة مع هذا النوع سيئة جدا، المهم روحنا مع مجموعة من الثوريين من مختلف الأقطار العربية للقاء وكانت الست بثينة موجودة لتقديم الكتاب.

فإيه بقه، إللي حصل إنها أولا تجاوزت فترتها بتاعة النص ساعة بنص ساعة كمان، وتلات أربع كلامها عن إنها مرشحة الرئاسة والكثير من ال أنا أنا أنا، بالرغم أن الموضوع أساساً عن التدوين والإعلام وتأثيرهم في الصورة المصرية، فالحديث عن إنجازاتها في قراءة النشرة واعتزالها عن النشرة ومنع برامجها ليس له علاقة عن قريب أو بعيد بالإعلام الجديد (ربما العلاقة الوحيدة هي حرية التعبير) 

ومش بس كده، هي اختصرت كل الإعلام الجديد في تويتر، بدائة كلامها إنها عمرها مدونت عشان نسيت الباسوورد بتاعها وإنها عوضت ده بتويتر. وطالعة بعد كده تعلمنا عن فضيلة الاختصار وإن تويتر 140 حرف بس، وهي إللي تجاوزت فترتها أصلاً. 

غير إنها جايبة مستشار مخصوص عشان يقول إنه يدعمها للرئاسة ويروح بعدها المطار.

 
فعندما وجد الجمهور الموضوع كده، نهض واحد ممن يطلق على نفسه أنه كان في برلمان الشباب (أول مرة أسمع عنه، إلا لو كان بتاع البرنامج بتاع التلفزيون) وأراد التحدث عن رؤيته للثورة، فنهره الموديريتور باسم فتحي بالإضافة إلى بثينة أن يتحدث عن الموضوع (إللي هو في الأغلب ترشحها للرئاسة) حتى تأسف الرجل على مضض وقعد وهو مش على بعضه من الغيظ، مع قليل من المقاطعات منه على كلام لبثينة اعتبره نفس ما أراد أن يقوله. وفي نفس الوقت تقاطعه إسراء عبد الفتاح اللي زعقت في لما قولتلها تسيب الموديريتور باسم فتحي يتصرف.
 
خلاصة الموضوع أن بثينة كامل لا تصلح لأي مناقشة سياسية فضلاً عن أن تكون رئيسة، هي آخرها أن تكون سارة بالين المصرية.
 
طبعاً مش هتكلم عن الراجل الألماني إللي جايبينه (فريدريش ناومان كما هو واضح مؤسسة ألمانية) إللي قعد يتكلم عن كتاب عبرر وتخرر، وعن قيم الخرية. أنا معنديش مشكلة إن حد ألماني يتكلم بالعربي، بس ألف باء دبلوماسية إن الفرد ميتكلمش في مكان عام بلغة هو مش متمكن منها.
 
ليبرالية، طير انت.
3 Responses to عن بثينة كامل: قليل من التدوين، كثير من الرئاسة
  1. lasrem رد

    يا لهوى !!
    يلا بقى ناقص أسامة منير (مع كل احترامى لشخصه) يبقى رئيس وزارة فى عصرها الذهبى عشان الشباب يبقى سيس أصلى

    بس انت ليه كاتب فى الآخر يا محمد .. ليبرالية طير انت؟ .. مش فاهمةدى

  2. Mohamed ElGohary رد

    لإنها المرشحة الليبرالية النسائية الأبرز

  3. Bothayna رد

    الأبرز
    فعلا
    :))

اترك رداً على Bothayna إلغاء الرد